《港馬攻略》EP238 – 大賽論戰攻略：有馬記念2023

2023年壓軸越洋轉播賽，喺日本被譽為「跑馬王之戰」嘅有馬記念，將於今個星期日喺中山競馬場盛大上演。雖然上屆冠軍兼今年馬王「春秋分」已經退咗役打唔到衛冕戰兼衝擊秋古馬三冠，不過今屆嘅精彩程度一啲都冇減弱到，甚至因為而加會有多匹一級賽冠軍聚首一堂而令局勢更加緊湊，究竟邊匹明星馬可以成為星中之星，標到呢個份量十足嘅尾會？

近五屆有馬記念，雌馬就已經贏咗兩屆，仲有兩屆最叻有第三，顯示馬女一啲都唔蝕底㗎，而今屆亦有多匹雌馬參戰，領軍嘅相信就係「星映天下」同「遊遍汪洋」。「星映天下」呢匹上年度兩冠馬后，今季就真係十分失運，暫時仲未贏到年長馬一級賽，但上場跑日本盃對住世一「春秋分」，甚至係應屆三冠馬后「自由島」，「星映天下」都可以追近佢哋跑第三，級數絕對夠晒高，今次比返李慕華跑，可唔可以令「星映天下」成功開胡？

至於另一匹李慕華都熟悉嘅就係「遊遍汪洋」。呢匹可以喺寶塚記念輸比「春秋分」唔夠一個馬位嘅馬女，上場遠征法國凱旋門雖然直路際遇差到喊，但佢一樣照爆上嚟跑第四名，其實真係勁到飛起，講緊頭三名隻隻都猛料，包括不敗冠軍「頂級衝力」。雖然今場「遊遍汪洋」會轉配池添謙一，但寶塚記念嗰場正正就係佢騎，再度合作會唔會帶比「遊遍汪洋」首項G1？

雖然兩匹馬女實力十足，但馬仔們都唔可以睇少，兩匹春季天皇賞冠軍「領銜」同埋「駿天宮」，講氣量佢哋當然十足啦，前者上年一口氣連贏春季天皇賞同埋寶塚記念，奠定佢日本長途王嘅地位，不過自遠征凱旋門返嚟再加埋健康受挫，呢匹馬一度以為要告別綠茵場，秋季復出熱身咗兩場，「領銜」可唔可以重現威風？

至於「駿天宮」今年表現就真係極度穩定，而且亦都終於喺春季天皇賞贏到佢嘅首項一級賽冠軍。上場出戰秋季天皇賞，末段得佢一隻可以收復大量失地而撲近「春秋分」，之後刻意避戰日本盃，唞夠賺埋體力，會唔會佢先係真命天子？

「勝局在望」既然係極少數贏到「春秋分」嘅馬，呢匹打吡冠軍能力絕對唔使懷疑，可惜嘅係佢同「領銜」一樣遠征完凱旋門之後健康就一直有事，不過好彩係由秋季天皇賞開始到日本盃，「勝局在望」好似開始跑得返，今次同老拍檔武豊久別重逢，係咪可以交出佢最高水準？

以為講完？仲有一對三歲挑戰者呀，咁啱得咁橋佢哋分別就係「星映天下」同「遊遍汪洋」嘅同主馬：「初日高升」同埋「鍵琴高奏」，呢對冤家由皋月賞開始鬥到菊花賞，暫時比數就係「鍵琴高奏」兩次喺「初日高升」之前返，而佢哋各自都有場G1喺手。今次呢兩匹馬齊齊由3000米縮落嚟2500米，究竟係有天下第一高手莫雅之助嘅「鍵琴高奏」，定係有啱啱先幫社台贏G1嘅川田將雅坐鎮嘅「初日高升」，可以擊敗一眾年長馬為三歲馬三連霸？

今次《港馬攻略》將會首度集齊三位主持同大家一齊分析呢場年度壓軸大戰，究竟佢哋有啲咩心水？即刻去片睇吓啦！

========================================================

Facebook : https://www.facebook.com/RacingHotTalk
IG：https://www.instagram.com/racing.hot.talk/

========================================================
All credit goes to original owners for any videos or photos used in this channel.

#港馬攻略RacingHotTalk #香港賽馬 #賽馬 #海外賽馬 #日本賽馬 #有馬記念 #中山競馬場 #星映天下 #遊遍汪洋 #駿天宮 #領銜 #勝局在望 #鍵琴高奏 #初日高升 #草如茵 #ArimaKinen #NakayamaRacecourse #StarsOnEarth #ThroughSevenSeas #JustinPalace #Titleholder #DoDeuce #Tastiera #SolOriens #Pradaria #スターズオンアース #スルーセブンシーズ #ジャスティンパレス #タイトルホルダー #ドウデュース #タスティエーラ #ソールオリエンス #プラダリア